শাৰদীয় প্ৰেম - অসমীয়া কবিতা

কবি - ৰূপম হাজৰিকা

ৰাতিপুৱালৈ
এতিয়া মাথোঁ
এটা প্ৰহৰ

কালিলৈ তুমি
নিয়ৰৰ ফুল বিচাৰি
মোৰ পদূলিত
ভৰি দিবাহি

বেলিটো দুগালত লৈ
খিল্‌খিলাই উঠিব
মোৰ কবিতাবোৰ

তোমাৰ মিঠা হাঁহিত
বাগৰি বাগৰি

কুঁৱলীয়ে ঢাকিব নোৱৰা
নিৰাভৰণ
আমাৰ শাৰদীয় প্ৰেম
পূৰ্ণতা আনে জীৱনলৈ

প্ৰতিটো পুৱা তুমি
এটি অনুৰাগ হৈ আহা
হৃদয়-কুঠৰীত
ঝংকাৰ তোলা

এতিয়া
মোৰ ফুলনিত
হেজাৰ হেজাৰ
শেৱালি, খৰিকা-জাঁই
আৰু
অগণন বকুলৰ শাৰী